Judul : CERPEN - ORENG LAKE' NYAMANA SUHRAWI
link : CERPEN - ORENG LAKE' NYAMANA SUHRAWI
CERPEN - ORENG LAKE' NYAMANA SUHRAWI
Karya: Ajaz elmazry*
Sabelumma arè ombâr sè anyama Suhrawi la mukka' sarongnga asalèn salebbâr bârna celleng ambung. Nandhâ'aghi mangkatta nyiram cabbhi è sabâna sè bâdâ ra-kèra lèma-ratos miter è dâjâna bengkona. Lalakè' sè andi' ana' tello' ghânika lalakona ta' nettep. Kasabbhâ è sarè lèbât bânnya' bârna. Kadhiyâ atani bân ngala' koliyân ka orèng. Kadhâng nyoro alandu'. Bâdâ nyoro alako bangunan. Torkadhâng ngangko' beddhi dâri songai. Poko'na sakabbhina kalakoan koli è sangghubhi kabbhi mon ghi' abâ'na mampu bân bisa. Sè ta' perna è lakonè Suhrawi ghun nyarè kasab kalabân jhâlân merantau.
Rè-saarèna terros ajhâlâni odi' sè ènga' jârèa. Ta' perna dhusonan bân ta' perna aserro amarghâ Suhrawi tao jhâ' apa sè è jhâlani jârèa la ghâris sè è tantoaghi pangèran. Sabbhân malam sè è pènta samarèna alaksana'aghi rakaat sonnat malarmandhâr rajhâkkè sè è kaollè dhâddhina kabherkatan èdâlem ajhâlâni odi' abhâreng bâla. Bân na'potana samoghâ dhâddhiyâ orèng sè aghuna mongghu aghâma bân bhângsana kalabân ngaollè ridâ'na ru-ghuruna bân èlmo sè barokah. Tangissa Suhrawi sabbhân malam ghun nyapcap ka sajâdâna. Ta' perna matangalè mata mèra è adâ'na bini bân na'potona. Mon la apolong bi' bâlâna pagghun Suhrawi manyonar salèrana, mapaddhâng mèngès amaksot ngabhâri kanjhembârân è dâlâm odi'na. Ta' terro nangalèa bâlâna noro' tangghungan sossa.
Ra-kèra pokol pètto' lagghu Suhrawi mole dâri sabâna. Èntar ka jedding abacco sokona sè possa' bân cellot. Araop pas terros ngala' wudu' aniat alaksanaaghiyâ rakaat dhuha. Marena ngolok salam bân adhuwâ ka pangèran, Suhrawi asalèn ngangghuy calana bu-abu karèna ana'na sè wa'-toa'an. Angghuyyâ ana'na ghi' asakola aliyah.
"Ka', nika' dhâ'ârânna ampon ranta. Ngèrèng sè adhâ'ârrâ dhimin" Pangolokka rèng bini' ngangghuy kalambhi korong bhâtèk kèmbhâng mèra manjheng è lâbângnga dâpor.
"Yâ, lè'. Marèna. Èngko' ghi' masang talèna caddhâng"
"Sampèan marèna alakoa è ka'dimma?"
"È lao' songai lè'. Din Matrawi. Abhutokka sabbhrâng. Bâdâ apa yâ?" Suhrawi ghetton. Sa'-biasa'enna mon la binina atanya ampo bâdâ maksot laèn.
"Oh, èngghi ka'. Polana kan atanya. Ana'na marèna mangkatta mè' amitta ka sampèan"
Saampona marè ngakan la'-ola'na binina. Nase' jhâghung. Ghângan marongghi. Jhuko' tahu bân kocekka pettès. Suhrawi mangkat sambi arokok toro' jhâlan. Landu'na è pèkol. Caddhângnga èangghuy. Dâlem atèna akarettek. Samoghâ ollèa rajhekke sè bherkat. Amarghâ ana'na sè wa-toa'an bhâdi mangkatta polè ka perantauan kaangghuy nyarè èlmo è sakola'enna.
Adzan duhur è kaèding dâri rong-corongnga masjid. Tandhâ Suhrawi la dâpa' ka bhâktona laot. Abhâjâng bân ngakan. Suhrawi molè ka bengkona ajhâlan alèmbây. Biasana mon kalakoanna jhâu Suhrawi asango sarung bân kalambhi soccè. Tapè mon semma' Suhrawi laot ka bengkona. Ca'na kobássa'an mandi è jedding.
Sabellunna Suhrawi abâli polè ka kalakoanna è sabâ. Yanto amit ka eppa'na.
"Pak. Kaulâ mangkatta marèna pokol duwâ'"
"Yâ, cong. Tèngatè yâ bâdâ è dhisana orèng. Niattè pateppa' pa'apa'a sè è kalako. Jhâ' loppaè dhuwâ'âghi bângaseppona bân ru-ghuruna bilâ bâ'na la marè abhâjâng. Bhâghus sè ghi' bâdâ è dhunnya otabâ sè la tadâ' omor. Nyo'on kabherkatan odi' bân èlmo sè manfaat"
"Engghi, pak" Yanto nondu' aonggu' nyerrep dhâ-dhâbuwân dâri eppa'na.
"Anyo'onna dhuwâna, pak" Tanangnga Suhrawi è kala' bi' yanto pas è sèom. Matana nyarembeng. Atèna ngennes sambi akarettek
"Ghustè, samoghâ abdhina kellar mabhunga rèng seppo bân aghuna mongghu orèng bânnya'. Paghâmpangaghi sadhâjâ parkara abdhina, Ghustè" Karettekghâ
Jhâm è ampèrra la èabâs pokol sèttong. Bâktona pak suhrawi abâli polé ka lao' songai. Rokokna è solet toro' jhâlân. Mon ghi' neng-neng arokok ta' nyaman ka Matrawi tako' malem ghâllu sè nerrosaghiyâ bhutokanna. Saongghuna sè è koca' laot yâ ghun ambu abhutok. Mon pèkkèrra bân atèna pagghun aca'-ranca' mèkkèr sabhârengnga. Sè kemma kabhutoan bàlânjhâna dâpor, jhâjhânna na'poto, laèn polè ghi' tèngkana. Cacana ghun atabur ghellâ'. Mon atèna ngennes aghili pangarep. Ta' bu-ambu sè è kadhikkèr coma nyo'on kabherkatan odi' sabâlâ bân aghuna ngabdhi ka aghâma bân bhângsana.
Saabiddhâ Suhrawi mabungko' tengngana è tèngnga sâbâ. Pellona aghili ka teng-montengnga. Bhutokanna è parèngè marè kèa. Ngaso sakejjhâ' è tabun sambi ngènom karèna kopi.
"Matrawi, engko' molèa yâ"
"Yâ, Wi. Klangkong" Matrawi sambi maghi opana lako ka Suhrawi.
Marè alako Suhrawi bânni langsung molè ka bengkona, tapè ghi' terros ka sabâna dhibi' kaangghuy nyiram tatamenanna. Opa sè dâri Matrawi è sèmpen è kasangnga tako' èlang. Asyokkor è kennèng ghâbây bâlânjhâna dâpor bân jhâjhânna ana'na sè kaduwâ, Misnati bân Gani. Alè'na Yanto. Bilâ la rong-corongnga masjid amonyi kèr-dhikkèran. Bhuru Suhrawi molè ka bengkona. Mandi nyoccè'è bhâdhânna. Angghuyyâ sè atolo cellot è sassa. Pas dhuliyân asalèn kaangghuy abhâjang asar tako' ta' kacapo'.
Nyellang adzan maghrib. Suhrawi ju'-toju' ngaso maloros tengngana amarghâ saarèan ta' laot sakalè è ampèrra sambi jhur-ngonjhur. Aghâjâ'i ana'na sè bungso. Omorra ghi' bhuro lèbat du-taon. Dhâddhi ghi' bur-lèburrâ è ghâjâ'i. Laèn bân ana'na sè nomer duwâ', Misnati. Pèkkèrna la bhâk tao ka cacana orèng. Omorra la niddhâ' du-bellâs taon. Sakolaenna la kellas lèma' taon satèa ongghâ'â ka kellas ennem. Mon la kaloar, Suhrawi andi' niat mamondhugghâ ana'na ka pesantren. Bânni orèng kalebbiyân. Kèng Suhrawi jhât karè ajhânjhi ka abâ'na è dâlem bhân-sabbhân sojuddhâ. Mon urusân nyarè èlmo. Bân na'potona ghi' padâ kenceng. Malarmandhâr terros è parènganna kakowatan kaangghuy abiayai.
Nida' è masjid bân langghâr la rammè. Nandhâ'aghi korang lèma mennit aghi' la maso' bhâkto maghrib. Na'-kana' è ghâ-tatangghâ la padâ dâteng ghân sèttong. Mon magrib sampè' isya'. Suhrawi morok na'-kana' ngajhi è bengkona. Mon katoronanna bânni na'potona kaji. Kèng la kencengnga ghâ-tatangghâna mangajhi ana'na ka bengkona Suhrawi. Lu-ghâlluna Suhrawi ghun malaè ngajhi ana'na dhibi'. Kèng bilâ la sajân abit. Bâdâ ponakanna sè noro' ngajhi kèa ka Suhrawi. Pas terros sajân atambâ. Satèa la bâdâ korang lebbi sapolo na'-kana' sè ngajhi ka Suhrawi.
"Yâ, sè nola'a bremma. Jhâ' rèa urusân èlmo. Dhinâ la è bâlâ'enna sa taona abâ'. Tekka sakonè' malar mandhâr manfaatta" Oca'na Suhrawi ka binina bilâ la acarèta tentang na'-kana' sè ngajhi ka bengkona.
Bilâ la marè isya'. Suhrawi nyambi hasèl tanèna sè marè è panen bi' binina ghi' bhâkto sèang. kadhiyâ rantè, cabbhi bân sawi ka bengkona dhâghâng kaangghuy è jhuwâl. Mon teppa' ka bhâjrâ. Yâ sajhuwâlân ollè sabâlânjhâ'an bân kabâjârân arèsanna. Kèng mon teppa' ka modâna torkadhâng ta' cokop è kabelli jhuko' bân jhâjhâna na'potona kanan. Tapè Suhrawi pagghun abhâlângajâ. Ta' perna pengghâ' pangarep. Paggghun partajâ jhâ' tugâssâ manossa ghun usaha mon masala hasèl rèa koasana pangèran. Sè penting lakona è jhâlân sè teppa' bân niattè ghâbây sangona akhirat.
Tambaksari, 15 Juni 2020
*lahir dan besar dari keluarga tani
Demikianlah Artikel CERPEN - ORENG LAKE' NYAMANA SUHRAWI
Sekianlah artikel CERPEN - ORENG LAKE' NYAMANA SUHRAWI kali ini, mudah-mudahan bisa memberi manfaat untuk anda semua. baiklah, sampai jumpa di postingan artikel lainnya.
Anda sekarang membaca artikel CERPEN - ORENG LAKE' NYAMANA SUHRAWI dengan alamat link https://re-plye.blogspot.com/2020/06/cerpen-oreng-lake-nyamana-suhrawi.html
Posting Komentar
Posting Komentar